༄༅། །ཕྱི་ལོ་ ༢༠༢༤ ཟླ་བ་ ༠༨ ཚེས་ ༠༥ ནས་ ༠༩ བར་བོད་མིའི་སྒྲིག་འཛུགས་ཀྱི་ལས་བྱེད་འདེམས་བསྐོ་ལྷན་ཁང་གི་གོ་སྒྲིག་འོག རྒྱ་གར་ཧར་ཡ་ན་མངའ་སྡེའི་ནང་རྟེན་གཞི་བྱས་པའི་ཨོ་པི་ཇིན་ཊལ་གཙུག་ལག་སློབ་གཉེར་ཁང་དུ་བོད་མིའི་སྒྲིག་འཛུགས་ཀྱི་སྡེ་ཚན་འགན་འཛིན་དང་། ལས་ཁུངས་དོ་དམ་པའི་ལས་བྱེད་ ༢༥ ལ་ལས་དོན་གཟེངས་ཐོན་དང་བདེ་ཐང་ཆེད་ཚུལ་མཐུན་གཤིས་སྤྱོད་བསྟེན་ཚུལ་ཞེས་པའི་སྦྱོང་བརྡར་དབུ་འཛུགས་གནང་ཡོད།
དེ་ཡང་སྦྱོང་བརྡར་གྱི་དབུ་འབྱེད་མཛད་སྒོའི་ཐོག་གཙུག་ལག་སློབ་གཉེར་ཁང་གི་ལས་འཆར་འགན་འཛིན་ནི་ལག་ཤི་ཅ་ཏུར་བི་ཏི་ལགས་ཀྱིས་ཕེབས་བསུའི་གསུང་བཤད་གནང་རྗེས་ཇིན་ཊལ་བསྟི་གནས་ཁང་གི་འགོ་ཁྲིད་དང་འཛིན་སྐྱོང་ཤེས་ཡོན་སྡེ་ཚན་གྱི་ངེས་སྟོན་པ་རྒན་པ་འབུམ་རམས་པ་ར་ཇེཤ་ཀོ་ཅར་ལགས་ཀྱིས་ཕྱི་ལོ་ ༢༠༡༤ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ཞུས་པ་དང་ཆབས་ཅིག བོད་མིའི་སྒྲིག་འཛུགས་ཀྱི་སྲིད་སྐྱོང་གཙོས་པའི་ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་མཇལ་བའི་གནས་ཚུལ་དྲན་གསོ་དང་སྦྲགས། བོད་མིའི་སྒྲིག་འཛུགས་ལྷན་ཡུན་རིང་གི་འབྲེལ་བ་ཡོད་པ་མ་ཟད། བསྟི་གནས་ཁང་ངོས་ནས་བོད་མིའི་སྒྲིག་འཛུགས་ཀྱི་ལས་བྱེད་མང་པོར་འགོ་ཁྲིད་ནུས་རྩལ་ཀྱི་སྦྱོང་བརྡར་ཕུལ་ཡོད་པ་གསུངས། དེ་དང་འབྲེལ་ཏེ་ཁོང་གིས་ཚོགས་བཅར་བ་རྣམས་ལ་ཐེངས་འདིའི་སྦྱོང་བརྡར་གྱི་བསླབ་གཞི་ཁག་ངོ་སྤྲོད་གནང་ཞིང་། དེའི་ཁོངས་སུ་ནུས་པ་ལྡན་པའི་འབྲེལ་མོལ་འགོ་འཛུགས་སྟངས་དང་། དུས་ཚོད་སྟངས་འཛིན་བྱེད་ཕྱོགས། སྒེར་ཕན་ཚུན་གྱི་རྩོད་རྙོག་སྟངས་འཛིན་བྱེད་སྟངས། ཚོར་སྣང་གི་ཤེས་རབ་སོགས་འཚུད་ཡོད།
ལས་བྱེད་འདེམས་བསྐོ་ལྷན་ཁང་གི་དྲུང་ཆེ་ཚེ་རིང་དབྱངས་སྐྱིད་ལགས་ཀྱིས་ཁོང་མོ་ཕྱི་ལོ་ ༢༠༡༨ ལོར་ཐོག་མར་བསྟི་གནས་ཁང་དུ་ཚོགས་ཞུགས་པའི་ངོ་བོར་བཅར་བའི་མྱོང་ཚོར་དྲན་གསོ་དང་འབྲེལ། ད་ཐེངས་སྦྱོང་བརྡར་གོ་སྒྲིག་པའི་ངོ་བོར་ཕེབས་རྒྱུ་བྱུང་བར་དགའ་ཚོར་ཆེན་པོ་བྱུང་ཞེས་གསུངས། དེ་བཞིན་ཁོང་མོས་ད་ཐེངས་བསྟི་གནས་ཁང་ངོས་ནས་སྒྲིག་འཛུགས་ཀྱི་འབྲེལ་བར་ཆེ་བསྟོད་ཀྱི་ཚུལ་དུ་དམིགས་བསལ་ཆག་ཡང་ཐོག་སྦྱོང་བརྡར་གནང་བར་བསྔགས་བརྗོད་དང་སྦྲགས། སྦྱོང་བརྡར་སྐབས་གལ་ཆེ་ཤོས་ཚོགས་ཞུགས་པ་རྣམས་ཡིན་པས། ཚོགས་ཞུགས་པ་རྣམས་ནས་གོ་སྐབས་དམ་འཛིན་གྱིས་ལས་དོན་གཟེངས་ཐོན་ཡོང་ཐབས་དང་། བཟང་ཕྱོགས་ཀྱི་འགྱུར་བ་གཏོང་ཐབས་སུ་འབད་རྩོལ་གནང་དགོས་པའི་ལམ་སྟོན་གནང་།
དེ་རྗེས་ཇིན་ཊལ་བསྟི་གནས་ཁང་གི་འགོ་ཁྲིད་དང་འཛིན་སྐྱོང་ཤེས་ཡོན་སྡེ་ཚན་གྱི་ངེས་སྟོན་པ་སན་ཇེ་རའི་ལགས་ཀྱིས་ཚོགས་བཅར་བ་རྣམས་ལ་ཕེབས་བསུ་ཞུས་པའི་ཐོག ཚོགས་བཅར་བ་རྣམས་ནས་བསླབ་གཞི་ཁག་ལ་དོ་སྣང་ཆེན་པོ་སྦྱང་བརྩོན་གནང་དགོས་པའི་འབོད་སྐུལ་ཞུས་གྲུབ་མཚམས་སྦྱོང་བརྡར་དངོས་སུ་དབུ་འཛུགས་ཞུས་ཡོད་པ་བཅས། །
