༄༅། །ཕྱི་ལོ་ ༢༠༢༣ ཟླ་ ༨ ཚེས་ ༧ ནས་ ༡༧ བར་ཉིན་ ༡༠ རིང་ལས་བྱེད་འདེམས་བསྐོ་ལྷན་ཁང་གི་སྒོ་སྒྲིག་འོག་ས་ར་བོད་ཀྱི་མཐོ་རིམ་སློབ་གཉེར་ཁང་དུ་སྲུ་ཞུའི་ལས་བྱེད་གྲངས་ ༢༢ ལ་བོད་ཡིག་གི་ཟབ་སྦྱོང་དབུ་འཛུགས་གནང་། ཟབ་སྦྱོང་གི་དབུ་འབྱེད་མཛད་སྒོའི་ཐོག་ལས་བྱེད་འདེམས་ལྷན་གྱི་ཚོགས་གཙོ་དཔེ་ཟུར་དབང་འདུས་ཚེ་རིང་ལགས་དང་། ས་རཱ་མཐོ་རིམ་སློབ་གཉེར་ཁང་གི་སློབ་སྤྱི་པ་སངས་ཚེ་རིང་ལགས། ཟབ་སྦྱོང་གི་སློབ་སྟོན་པ་རྣམ་པ། ཟབ་སྦྱོང་བ་བཅས་མཉམ་ཞུགས་ཐོག་ཟབ་སྦྱོང་དངོས་སུ་དབུ་འཛུགས་ཞུས་ཤིང་། སྐབས་དེར་ས་རཱ་མཐོ་སློབ་ཀྱི་སློབ་སྤྱི་པ་སངས་ཚེ་རིང་ལགས་ནས་ཟབ་སྦྱོང་གི་ངོ་སྤྲོད་དང་འབྲེལ་བསླབ་གཞི་ཁག་ངོ་སྤྲོད་གནང་རྗེས་འདེམས་ལྷན་ཚོགས་གཙོ་དཔེ་ཟུར་དབང་འདུས་ཚེ་རིང་ལགས་ནས་ཟབ་སྦྱོང་འདིའི་དགོས་དམིགས་དང་གལ་གནད་སྐོར་གསུང་སྐབས་བོད་ནང་རྒྱ་ནག་གཞུང་གི་དྲག་གནོན་འོག་བོད་ཀྱི་ཆོས་དང་རིག་གཞུང་། སྐད་ཡིག་བཅས་པ་སྦྱོང་སྤྱོད་བྱེད་པར་དམ་བསྒྲགས་ཤུགས་ཆེ་བྱེད་བཞིན་ཡོད་སྟབས། བཙན་བྱོལ་རང་དབང་ལུང་པའི་ནང་ཡོད་པའི་བོད་མི་རྣམས་ནས་བོད་ཀྱི་ཆོས་དང་རིག་གཞུང་བདག་གཅེས་བྱ་རྒྱུ་གལ་གནད་ཆེན་པོ་ཡིན་པ་མ་ཟད་འགན་ཁྲིའང་ཡིན་ཞེས་དང་། ད་དུང་ཁོང་གིས་མུ་མཐུད་དེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཀའ་སློབ་ལམ་སྟོན་དང་། མི་རབས་རྒན་པ་རྣམས་ཀྱི་བཀའ་དྲིན་ལ་རྟེན་ནས་བོད་ཀྱི་ཆོས་དང་རིག་གཞུང་ད་བར་མི་ཉམས་རྒྱུན་འཛིན་གནང་ཐུབ་ཡོད་པའི་སྐོར་དྲན་གསོ་གནང་ཡོད་པ་རེད།