༄༅། །ཕྱི་ལོ་ ༢༠༢༤ ཟླ་བ་ ༠༡ ཚེས་ ༨ རེས་གཟའ་ཟླ་བའི་ཉིན་ལས་བྱེད་འདེམས་བསྐོ་ལྷན་ཁང་གིས་གོ་སྒྲིག་འོག་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་བོད་མིའི་སྒྲིག་འཛུགས་ཀྱི་འགན་འཛིན་སྡེ་ཚན་ཁོངས་ཀྱི་སྲི་ཞུའི་ལས་བྱེད་རྣམས་ལ་ཉེར་མཁོའི་བོད་ཀྱི་སྐད་ཡིག་ཟབ་སྦྱོང་དབུ་འཛུགས་གནང་ཡོད་པ་རེད། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༠༩ ཙམ་ལ་ཟབ་སྦྱོང་དབུ་འབྱེད་ཀྱི་མཛད་སྒོའི་སྐུ་མགྲོན་གཙོ་བོར་ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་་དཔེ་ཟུར་དབང་འདུས་ཚེ་རིང་མཆོག་དང་། འདེམས་ལྷན་དྲུང་ཆེ་ཚེ་རིང་དབྱངས་སྐྱིད་ལགས། ས་རཱ་མཐོ་སློབ་ཀྱི་སློབ་སྤྱི་པ་སངས་ཚེ་རིང་ལགས། དེ་བཞིན་ཟབ་ཁྲིད་པ་རྣམ་པ། ཟབ་སྦྱོང་ལ་མཉམ་ཞུགས་གནང་མཁན་སྲི་ཞུའི་ལས་བྱེད་བཅས་ཚང་འཛོམས་ཐོག་ས་རཱ་མཐོ་སློབ་ཀྱི་སློབ་སྤྱི་པ་སངས་ཚེ་རིང་ལགས་ཀྱིས་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སྐོར་ངོ་སྤྲོད་གསུང་བཤད་གནང་གྲུབ་མཚམས་སྐུ་མགྲོན་གཙོ་བོ་ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་དཔེ་ཟུར་དབང་འདུས་ཚེ་རིང་མཆོག་གིས་ཟབ་སྦྱོང་འདིའི་དགོས་དམིགས་དང་གལ་གནད་སྐོར་གསུང་སྐབས་སྲི་ཞུའི་ལས་བྱེད་རྣམ་པའི་བོད་ཀྱི་སྐད་ཡིག་གོང་མཐོར་གཏོང་རྒྱུར་དམིགས་ཏེ་ཟབ་སྦྱོང་གོ་སྒྲིག་གནང་བ་ཡིན་སྐོར་གསུངས་ཞིང་། བོད་ཀྱི་སྐད་ཡིག་སྲུང་སྐྱོབ་དགོས་གལ་སྐོར་ལམ་སྟོན་གསུང་བཤད་གནང་ཡོད་པ་རེད།
སྤྱིར་ཕྱི་ཚེས་ ༨ ནས་ ༡༣ བར་ཉིན་གྲངས་དྲུག་གི་རིང་གོ་སྒྲིག་ཞུས་པའི་ཉེར་མཁོའི་བོད་ཡིག་ཟབ་སྦྱོང་འདིའི་ཐོག་དྲུང་ལས་ནས་ཟུང་དྲུང་བར་གྱི་སྲི་ཞུའི་ལས་བྱེད་ཁྱོན་ ༡༦ མཉམ་ཞུགས་གནང་འདུག་པ་དང་། ཁོང་རྣམས་ལ་བོད་ཀྱི་ལོ་རྒྱུས་དང་། གཞུང་འབྲེལ་ཡིག་བཟོ། སུམ་རྟགས། བཅའ་ཁྲིམས་སྐོར་ཟབ་ཁྲིད་གནང་གི་ཡོད་པ་རེད་འདུག་པ་བཅས།།