༄༅། །ཕྱི་ལོ་ ༢༠༢༥ ཟླ་ ༨ ཚེས་ ༤ ཉིན་ལས་བྱེད་འདེམས་བསྐོ་ལྷན་ཁང་གི་གོ་་སྒྲིག་འོག་ལས་བྱེད་འདེམས་ལྷན་གྱི་ཚོགས་གཙོ་ཀརྨ་ཡེ་ཤེས་མཆོག་དང་དྲུང་ཆེ་བསྟན་འཛིན་ལེགས་གྲུབ་ལགས་དབུ་ཞུགས་ཐོག་རྡ་ས་འཛིན་སྐྱོང་སྦྱོང་བརྡར་སྟི་གནས་ཁང་དུ་བོད་མི་སྒྲིག་འཛུགས་ཀྱི་ལས་བྱེད་གསར་འདེམས་གྲངས་ ༢༤ ལ་བདུན་ཕྲག་གསུམ་རིང་བོད་ཡིག་གཙོ་གྱུར་འཛིན་སྐྱོང་དང་འབྲེལ་བའི་ཟབ་སྦྱོང་དབུ་འཛུགས་གནང་། ཐོག་མར་འདེམས་ལྷན་གྱི་དྲུང་ཆེ་མཆོག་ནས་ཟབ་སྦྱོང་གི་སློབ་ཚན་དང་སློབ་འཁྲིད་པ་དེ་བཞིན་ཟབ་སྦྱོང་གི་སྒྲིག་གཞི་ཁག་ངོ་སྤྲོད་གནང་གྲུབ་མཚམས། ལས་བྱེད་འདེམས་ལྷན་གྱི་ཚོགས་གཙོ་བཀའ་ཟུར་ཀརྨ་ཡེ་ཤེས་མཆོག་གིས་འཚམས་འདྲི་དང་འབྲེལ་ཟབ་སྦྱོང་འདི་ནི་འཛིན་སྐྱོང་གི་ལས་དོན་ཐོག་ལག་ལེན་ཤེས་ཚད་ཀྱི་ནུས་པ་གོང་མཐོར་གཏོང་རྒྱུར་གལ་འགངས་ཆེ་ཚུལ་སྐོར་གསུངས་པ་དང་། ཁོང་གིས་བོད་མིའི་སྒྲིག་འཛུགས་ཀྱི་ནུས་པ་ཡར་རྒྱས་གོང་མཐོར་གཏོང་ཆེད། གསར་འདེམས་སྲི་ཞུའི་ལས་བྱེད་ཚོས་འཇོན་ནུས་གང་ཐུབ་ཀྱིས་འཛིན་སྐྱོང་གི་ལས་དོན་ཐོག་དམིགས་བསལ་གྲུབ་འབྲས་ཐོན་ཐུབ་པ་ཞིག་བྱེད་དགོས་སྐོར་འབོད་སྐུལ་གནང་། དེ་བཞིན་ལས་བྱེད་ཚོས་བོད་མིའི་སྒྲིག་འཛུགས་ཀྱི་སྒྲིག་གཞི་ཁག་ལ་གཟིགས་ཞིབ་ཀྱིས་གཞུང་གི་ལས་དོན་ཁག་སྒྲིག་གཞི་གཞིར་བཟུང་གྲུབ་དགོས་པའི་སྐོར་གསུངས། གཞན་ཡང་ཁོང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། མི་རབས་རྒན་པ་ཚོས་བོད་དོན་ཐོག་སྐུ་ལས་ཚད་མེད་སྐྱོན་ཡོད་པའི་སྐོར་སོགས་འགྲེལ་བརྗོད་གནང་།
ཐེངས་འདིའི་ཟབ་སྦྱོང་ནང་ཉེ་ལམ་གསར་དུ་བསྐོས་པའི་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་གྲངས་ ༢༤ མཉམ་ཞུགས་ཀྱིས་ཟླ་འདིའི་ཚེས་ ༢༣ བར་བོད་ཀྱི་སྐད་ཡིག་དང་ལོ་རྒྱུས། གཞུང་འབྲེལ་ཡིག་བཟོ། བོད་མིའི་སྒྲིག་འཛུགས་ཀྱི་འཛིན་སྐྱོང་ངོ་སྤྲོད། བཙན་བྱོལ་བོད་མིའི་བཅའ་ཁྲིམས། དབུ་མའི་ལམ། རྩོད་རྙོགས་འདུམ་སྒྲིག། དེང་རབས་ཀྱི་འཕྲུལ་རིགས་བེད་སྤྱོད་སོགས་ཀྱི་སྐོར་སློབ་སྟོན་གནང་གི་ཡོད་པ་བཅས།།
