༄༅། །བོད་མིའི་སྒྲིག་འཛུགས་ཀྱི་ལས་བྱེད་འདེམས་བསྐོ་ལྷན་ཁང་ནས་ཕྱི་ལོ་ ༢༠༢༤ ཟླ་བ་ ༠༡ ཚེས་ ༢༤ ནས་ ༢༦ བར་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་པའི་བོད་ཡིག་བསླབ་གཞི་བཟོ་ཕྱོགས་ཀྱི་ཚོགས་འདུ་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་བསྐོང་ཚོགས་གནང་ཡོད་པ་རེད།
དེ་ཡང་ཚོགས་འདུའི་དབུ་འབྱེད་མཛད་སྒོའི་ཐོག་ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་དཔེ་ཟུར་དབང་འདུས་ཚེ་རིང་ལགས་དང་། འདེམས་ལྷན་དྲུང་ཆེ་ཚེ་རིང་དབྱངས་སྐྱིད་ལགས། འདེམས་ལྷན་ལས་འཆར་འབྲེལ་མཐུད་པ་བསོད་ནམས་ཆོས་འཛོམས་ལགས། བོད་ཡིག་ཆེད་ལས་པ་རྣམ་པ་བཅས་ཕེབས་ཞུགས་ཀྱི་ཐོག་མར་སྐུ་མགྲོན་གཙོ་བོ་ནས་སྣང་གསལ་མར་མེ་ཞལ་འབྱེད་དང་སྦྲགས། ལས་བྱེད་འདེམས་བསྐོ་ལྷན་ཁང་གི་དམིགས་ཡུལ་དང་ལས་དོན་བྱེད་ཕྱོགས། བོད་ཡིག་གི་གལ་གནད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་བསྒྲུབ་རྒྱུ་སོགས་ཀྱི་སྐོར་གསུང་བཤད་གནང་ཡོད།
སྤྱིར་ཉིན་གྲངས་གསུམ་རིང་གི་བསླབ་གཞི་གཏན་འབེབས་ཀྱི་ཚོགས་འདུ་དེ་བཞིན་བོད་མིའི་སྒྲིག་འཛུགས་ཀྱི་ནུས་པ་གོང་མཐོར་དང་རྒྱུན་གནས་ལས་གཞིའི་འོག་གོ་སྒྲིག་གནང་བ་ཞིག་ཡིན་པ་དང་། ལས་དོན་དེའི་ཆེད་ཨ་རིའི་རོགས་ཚོགས་ཀྱིས་དཔལ་འབྱོར་མཐུན་འགྱུར་གནང་ཡོད་པ་བཅས།།
