༄༅། །ཕྱི་ལོ་ ༢༠༢༣ ཟླ་ ༡༠ ཚེས་ ༤ ནས་ ༢༤ བར་ཉིན་ ༢༡ རིང་ལས་བྱེད་འདེམས་བསྐོ་ལྷན་ཁང་གི་སྒོ་སྒྲིག་འོག་རྡ་ས་འཛིན་སྐྱོང་སྦྱོང་བརྡར་བསྟི་གནས་ཁང་དུ་ལས་བྱེད་གསར་འདེམས་གྲངས་ ༡༧ ལ་བོད་ཨིན་སྐད་ཡིག་གཙོ་འགྱུར་ཐོག་འཛིན་སྐྱོང་དང་འབྲེལ་བའི་ཟབ་སྦྱོང་དབུ་འཛུགས་གནང། དེ་ཡང་གོང་ཚེས་ཉིན་གྱི་སྔ་དྲོ་ཟབ་སྦྱོང་གི་དབུ་འབྱེད་མཛད་སྒོའི་ཐོག་ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་དཔེ་ཟུར་དབང་འདུས་ཚེ་རིང་ལགས་དང་། དྲུང་གཞོན་ཀརྨ་འཕྲིན་ལས་ལགས། འདེམས་བསྐོ་ལྷན་ཁང་གི་འབྲེལ་ལས་རྣམ་པ། སྲི་ཞུའི་ལས་བྱེད་གསར་པ་རྣམ་པ་བཅས་ཚང་འཛོམས་ཐོག་ཟབ་སྦྱོང་དངོས་སུ་དབུ་འཛུགས་ཞུས་པའི་ཐོག་མར་ཀརྨ་འཕྲིན་ལས་ལགས་ཀྱིས་སློབ་ཚན་དང་སློབ་ཁྲིད་པ་ངོ་སྤྲོད་དང་ཟབ་སྦྱོང་སྐབས་ཀྱི་སྒྲིག་གཞི་ཁག་ངོ་སྤྲོད་གནང་ཡོད།

དེ་ནས་ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་དཔེ་ཟུར་དབང་འདུས་ཚེ་རིང་ལགས་ཀྱིས་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་རྣམས་ནས་བཙན་བྱོལ་བའི་བཅའ་ཁྲིམས་དང་ཁྲིམས་སྒྲིག་ཁག་དང་འགལ་མེད་ལས་དོན་བྱེད་ཕྱོགས་དང་། ཟབ་སྦྱོང་སྐབས་བློ་སྐྱེད་ལེགས་ཆ་བླངས་ཏེ་རང་ཉིད་ཀྱི་ནུས་རྩལ་གོང་མཐོར་གཏང་རྒྱུར་འབད་རྩོལ་གནང་དགོས་པའི་འབོད་སྐུལ་ཞུས་ཡོད། དེ་བཞིན་ཁོང་གིས་བོད་མིའི་སྒྲིག་འཛུགས་ཀྱི་ལས་བྱེད་ཡིན་པའི་ཆ་ནས་བོད་ཀྱི་སྐད་ཡིག་ལ་དོ་སྣང་སློབ་སྦྱོང་གང་ཐུབ་གནང་དགོས་པ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་མི་མི་རབས་རྒན་པ་རྣམས་ནས་སྐུ་ལས་སྐྱོན་སྟངས་ལས་སེམས་འགུལ་ཐེབས་ཏེ་བོད་མིའི་སྒྲིག་འཛུགས་ནང་རྒྱུན་རིང་ཞབས་ཞུ་སྒྲུབ་ཐབས་ལ་འབད་རྩོལ་གནང་དགོས་པའི་ལམ་སྟོན་གནང་ཡོད་པ་རེད།

ཐེངས་འདིའི་ཟབ་སྦྱོང་ནང་ཉེ་ལམ་གསར་འདུ་བསྐོས་པའི་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་གྲངས་ ༡༧ མཉམ་ཞུགས་ཀྱིས་ཟླ་འདིའི་ཚེས་ ༢༤ བར་བོད་ཀྱི་སྐད་ཡིག་དང་། ལོ་རྒྱུས། གཞུང་འབྲེལ་ཡིག་བཟོ། བོད་མིའི་སྒྲིག་འཛུགས་ཀྱི་ལས་བྱེད་གནང་ཕྱོགས། བཙན་བྱོལ་བོད་མིའི་བཅའ་ཁྲིམས། དབུ་མའི་ལམ་སོགས་ཀྱི་སྐོར་སློབ་སྟོན་གནང་གི་ཡོད་པ་བཅས།།