༡། ཕྱི་རྒྱལ་ཁག་ཏུ་སྐུ་ཚབ་དོན་གཅོད་བསྐོ་གཞག་གནང་ཕྱོགས་ནི། སྲིད་སྐྱོང་དང་བཀའ་བློན་ཚང་འཛོམས་ཞིབ་གྲོས་དྲག་འདེམས་ཀྱིས་བཀའ་ཤག་ནས་བསྐོ་འཛུགས་གནང་བར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་ཀྱི་མཚན་གནས་བསྩལ་རྒྱུར་སྒྲིག་གཞི་འདིའི་དོན་ཚན་ཁག་དང་བསྟུན་མི་དགོས་ཤིང་། བསྐོ་གཞག་འདི་རིགས་ཀྱི་མི་འགྲོ་ལས་བྱེད་མ་ཡིན་པ་ཞིག་ཡིན་ན་ཕོགས་རིམ་དང་ཁེ་ཕན་གཞན་དག་བསྐོ་གཞག་དང་ཆབས་ཅིག་གཏན་འབེབས་གནང་རྒྱུ། སྒྲིག་གཞི་གཞིར་བཟུང་ལོ་བཞི་ཟིན་མཚམས་གནས་སྤོ་བྱ་རྒྱུ་དང་། དགོས་གལ་དམིགས་བསལ་ཅན་བྱུང་རིགས་ལ་ལོ་གཉིས་ཕར་འགྱངས་ཆོག་རྒྱུ།
༢། བདེ་སྲུང་ལས་ཁུངས་ཁྱབ་ཁོངས་དང་བཅས་པར་གསང་བའི་ལས་བྱེད་མི་འགྲོ་གསར་འདེམས་བྱེད་ཕྱོགས་ཀྱི་འཆར་གཞི་ཞིབ་གསལ་བཀའ་ཤག་ཏུ་འབུལ་རྒྱུ་དང་། བཀའ་ཤག་ནས་ཞིབ་འཇུག་སྟངས་འཛིན་གནང་སྟེ་འོས་བབས་མཆིས་རིགས་ལས་བྱེད་འདེམས་ལྷན་དུ་འབུལ་རྒྱུ། འོན་ཀྱང་གསལ་བསྒྲགས་བྱེད་མ་དགོས་པ་ཡིན།
༣། འགན་འཛིན་སྡེ་ཚན་གྱི་ལས་བྱེད་ཟུང་དྲུང་མན་དང་། ལས་བྱའི་སྡེ་ཚན་གཉིས་ཀའི་གནས་རིམ་གང་འོས་ཐོག་བོད་ཨིན་ཕུད་པའི་སྐད་ཡིག་ཚད་འཕེར་ཅན་གྱི་དགོས་ངེས་ལས་བྱེད་བསྐོ་གཞག་མི་བྱེད་ཐབས་མེད་བྱུང་སྐབས་བཀའ་ཤག་ནས་ཁུངས་འཕེར་རྒྱུ་མཚན་དང་སྦྲགས་ལས་བྱེད་ས་མིག་ཇི་དགོས་ལས་བྱེད་འདེམས་བསྐོ་ལྷན་ཁང་ལ་འཆར་འབུལ་གནང་རྒྱུ་དང་། ལས་བྱེད་འདེམས་བསྐོ་ལྷན་ཁང་ནས་ཞིབ་འཇུག་གིས་དགོས་གལ་གཟིགས་ཚེ་འདེམས་བསྐོ་ཆོག་རྒྱུ། དེ་འདྲའི་རིགས་སྐབས་བབས་མཁོ་གནད་ལ་གཞིགས་ཏེ་མང་མཐར་ལོ་རེར་ལས་བྱེད་སྤྱི་ཡོངས་ས་མིག་བརྒྱ་ཆ་གཅིག་ལས་མ་མང་བ། གཞི་རྩའི་ཆ་རྐྱེན་དང་། ལོ་ཚད། བསྐོ་ལམ་བཅས་ལས་བྱེད་འདེམས་བསྐོ་ལྷན་ཁང་གི་འདེམས་རྒྱུགས་སྒྲིག་གཞི་རྩ་བཟུང་བྱ་རྒྱུའང་། ཤེས་ཚད་ལག་ཁྱེར་ངེས་པར་མི་དགོས།
༤། སྐུ་ཚབ་དོན་གཅོད་ཁང་ཁག་ཏུ་རྒྱ་རིགས་འབྲེལ་མཐུད་པ་དང་། ལྟ་གྲུབ་དགེ་རྒན་གྱི་ས་མིག་ཏུ་ལས་བྱེད་བསྐོ་གཞག་དགོས་གལ་བྱུང་ཚེ། ཟུང་དྲུང་མན་གྱི་གནས་རིམ་དུ་འབྲེལ་ཡོད་བཀའ་བློན་ལས་ཁུངས་སོ་སོའི་འཆར་འབུལ་ལ་བཀའ་ཤག་གི་རྒྱབ་གཉེར་བརྒྱུད་ལས་བྱེད་འདེམས་ལྷན་ལ་བཀའ་འཁྲོལ་ཞུས་ཏེ་མང་མཐར་ལས་ཡུན་ལོ་ལྔའི་རིང་དམིགས་བསལ་བསྐོ་གཞག་ཆོག་རྒྱུ། ལས་བྱེད་འདི་རིགས་བཀའ་ཤག་སྐབས་རེའི་ཡུན་ཚད་ནང་ས་མིག་རྩ་འབོར་གྱི་བརྒྱ་ཆ་ ༡༌༥ ལས་བརྒལ་བ་བསྐོ་གཞག་མི་ཆོག