༄༅། །ཕྱི་ལོ་ ༢༠༢༤ ཟླ་ ༡༡ ཚེས་ ༤ ཉིན་ལས་བྱེད་འདེམས་བསྐོ་ལྷན་ཁང་གི་སྒོ་སྒྲིག་འོག་ལས་བྱེད་འདེམས་ལྷན་གི་ཚོགས་གཙོ་ཀརྨ་ཡེ་ཤེས་མཆོག་དང་དྲུང་ཆེ་བསྟན་འཛིན་ལེགས་གྲུབ་ལགས་དབུ་ཞུགས་ཐོག་རྡ་ས་འཛིན་སྐྱོང་སྦྱོང་བརྡར་བསྟི་གནས་ཁང་དུ་བོད་མི་སྒྲིག་འཛུགས་ཀྱི་ལས་བྱེད་གསར་འདེམས་གྲངས་ ༣༣ ལ་ཉིས་གྲངས་ ༢༡ རིང་བོད་ཡིག་གཙོ་གྱུར་འཛིན་སྐྱོང་དང་འབྲེལ་བའི་ཟབ་སྦྱོང་དབུ་འཛུགས་གནང། ཐོག་མར་འདེམས་ལྷན་གྱི་དྲུང་ཆེ་ནས་ཟབ་སྦྱོང་གི་སློབ་ཚན་དང་སློབ་འཁྲིད་པ་དེ་བཞིན་ཟབ་སྦྱོང་གི་སྒྲིག་གཞི་ཁག་ངོ་སྤྲོད་གནང་། དེ་ནས་འདེམས་ལྷན་གྱི་ཚོགས་གཙོ་མཆོག་ནས་ཟབ་སྦྱོང་སྐབས་བློ་སྐྱེད་ལེགས་ཆ་བླངས་ཏེ་རང་ཉིད་ཀྱི་ནུས་རྩལ་གོང་མཐོར་གཏང་རྒྱུར་འབད་རྩོལ་གནང་དགོས་པའི་འབོད་སྐུལ་ཞུས་པ་དང་ལས་བྱེད་རང་ཉིད་ནས་དུས་རྒྱུན་དུ་༸གོང་ས་མཆོག་གི་བཀའ་དྲིན་དང་བཀའ་སློབ་བློ་ལ་བཅངས་ནས་རང་གཞུང་བོད་མིའི་སྒྲིག་འཛུགས་དུ་ཁ་ཞེས་གཉིས་མེད་ཐོག་ཞབས་ཞུས་གྲུབ་ཐབས་འབོད་རྩོལ་གནང་དགོས་པའི་ལས་སྟོན་གནང་ཡོད།

ཐེངས་འདིའི་ཟབ་སྦྱོང་ནང་ཉེ་ལམ་གསར་འདུ་བསྐོས་པའི་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་གྲངས་ ༣༣ མཉམ་ཞུགས་ཀྱིས་ཟླ་འདིའི་ཚེས་ ༢༣ བར་བོད་ཀྱི་སྐད་ཡིག་དང་། ལོ་རྒྱུས། གཞུང་འབྲེལ་ཡིག་བཟོ། བོད་མིའི་སྒྲིག་འཛུགས་ཀྱི་ལས་བྱེད་གནང་ཕྱོགས། བཙན་བྱོལ་བོད་མིའི་བཅའ་ཁྲིམས། དབུ་མའི་ལམ་སོགས་ཀྱི་སྐོར་སློབ་སྟོན་གནང་གི་ཡོད་པ་བཅས།།